திங்கள், 2 நவம்பர், 2015

குறுந்தொகை நூலாராய்ச்சி (பகுதி - 9) சிறுபொழுதுகள்

குறுந்தொகை நூலாராய்ச்சி (பகுதி - 9) சிறுபொழுதுகள்

 சிறுபொழுதுகள்
            சிறு பொழுதுகள் ஐந்தென்றும் ஆறென்றும் இரு வகைக் கொள்கைகள் உண்டு.
“காலையும் பகலுங் கையறு மாலையும்
 ஊர்துஞ்சி யாமமும் விடியலு மென்றிப் பொழுது”     (குறுந். 32)
என்னும் பாட்டில் ஐவகைச் சிறுபொழுதுகள் சொல்லப்படுகின்றன. காலைப் பொழுது புலர்ந்த பின்னுள்ள காலம் என்றும், பகல் நண்பகலை உள்ளிட்ட காலம் என்றும், மாலை சூரியன் மறைந்தது தொடங்கிய இரவின் முதல் யாமம் என்றும், யாமம் இடையிரவென்றும், விடியல் இரவின் கடைசி யாமம் என்றும் கொள்ள வேண்டும். இவற்றின் இடையே எற்பாடென்னும் பொழுதொன்றையும் கூட்டி ஆறாக உரைப்பர் வேறு சிலர்.
 மாலை
இச்சிறு பொழுதுகளில் மாலையைப் பற்றியே புலவர்கள் பெரிதும் புனைந்து கூறுகின்றனர். சூரியன் மறைந்த பின்னர் வானம் செந்நிறத்தை அடைகின்றது. நெடு வெண்ணிலவும் உடுக்களும் தோன்றுகின்றன.
ஆம்பல் முதலிய நீர்ப்பூக்கள் கூம்புகின்றன; முல்லை, பகன்றை முதலியன மலர்கின்றன. கடலும், கானலும் பொலிவிழந்து தனிமைக்கோலத்தோடு தோன்றுகின்றன. தொழில் மேற்சென்றார் தத்தம் தொழிலினின்றும் நீங்கி வீட்டுக்கு வருகின்றனர். விதைக்கும் பொருட்டுக் காலையில் சென்ற உழவர் விதை கொண்டு சென்ற வட்டி நிறைய மலரைப் பறித்து வைத்து மீளுகின்றனர். பசுக்களை வீட்டிற்கு ஓட்டி வரும் இடையன் வழியில் மலர்ந்த முல்லைப் பூவைப் பறித்துச் சூடி வருகின்றான். அந்த முல்லையின் மணமும் பொலிவும் மாலைக் காலத்தை விளக்கும் அடையாளங்களாகத் திகழ்கின்றன.
            பறவைகள் தத்தம் குஞ்சுகளுக்குரிய இரையை வாயில் கவ்விக் கொண்டு தாம் கூடு கட்டிய மரங்களில் வந்து அடங்குகின்றன. ஒரு பறவை மிக விரைவாகப் பறந்து வருகின்றது; அதன் அலகில் உணவு இருக்கின்றது; அந்த வேகத்தில் அதனைக் கைவிடாமல் பற்றிக் கொண்டு தன்னுடைய கூட்டிற்கு வந்து சேரும்போது தாயை எதிர்நோக்கி நிற்கும் குஞ்சு களிக்கின்றது. அது தன் வாயைத் திறக்கும்போது தாய்ப் பறவை தான் கொணர்ந்த உணவை அதன் உள் வாயிற் செருகுகின்றது. அதனை விழுங்க வேண்டும் என்ற அறிவு வராத அவ்வளவு இளைய குஞ்சு போலும்!
            இங்ஙனம் பல பறவைகள் தத்தம் கூடு வந்தடைய, வௌவாலோ பழுத்த மரங்களைத் தேடிப் புறப்படுகின்றது. காடுகளில் மான் தன் பிணையோடு புதர்களில் மறைந்தொடுங்குகின்றது. யானை மலை முழைஞ்சுகளில் ஒடுங்குகின்றது. புலிதன்னுடைய ஆட்சிக் காலம் வந்ததாக அறிந்து முழங்குகின்றது.

   இக்காலத்தில் தலைவரைப் பிரிந்த மகளிர் காம நோய் மேலிட்டு வருந்துவதைப் பல்வேறு வகையில் புலவர்கள் சுவைபடப் புலப்படுத்துகின்றனர். தலைவியர் மாலைக் காலத்தை இகழ்வதும், மகளிர் விளக்கேற்றுவதும், விருந்தினரை உண்பதற்கு உள்ளே புகச்செய்து வாயிலைச் சாத்துவதும் இம்மாலைக் காலத்தில் நிகழ்வன.
(தொடரும்)

குறுந்தொகை: நூலாராய்ச்சி (பகுதி - 8): பொழுதுகள்

குறுந்தொகை: நூலாராய்ச்சி (பகுதி - 8): பொழுதுகள்

  கூதிர்
            ஐப்பசி, கார்த்திகை மாதங்கள் கூதிர்க் காலம். இப்பருவத்தில் குளிர் காற்று வீசும்; மழை பெய்த பின்பு எஞ்சிய துளிகளை மேகம் துளிக்கும்; அதனைச் சில்பெயல் என்பர். இப்பருவத்தில் கரும்பு பொதியவிழும்; ஈங்கைக்கொடி மலரும். கூதிர்ப் பருவத்தில் வீசும் வாடையின் குளிரினால் மக்கள் நடுங்குவர்; விலங்குகளும் பறவைகளும் துன்புறும். இக்காலத்தில் தலைவரோடு இருத்தலைத் தலைவியர் விரும்புவர்.
முன்பனி
            மார்கழி, தை மாதங்கள் முன்பனிப் பருவமாகும். இதனை அற்சிரம் என்றும், அச்சிரம் என்றும் வழங்குவர். இக் காலத்தில் வடகாற்று சிறிது வீசும். பனித் திவலை தண்ணென வீசும். மக்கள் வெந்நீரை உண்பதில் விருப்பம் உடையராவர். அவரை மலரும்; உழுந்தும் பயறும் முதிரும்.
பின்பனி
            மாசி, பங்குனி மாதங்கள் இப்பருவமாகும். “பின்பனிக் கடை நாள் தண்பனி யச்சிரம்” என்று இப்பருவத்தை ஒரு புலவர் குறிக்கின்றார். தண்ணிய பனித் துளியைக் காற்று வீசும்போது அத்துளிகள் நூலற்ற முத்துக்களைப் போலத் தோற்றுகின்றனவென ஒரு புலவர் புனைகின்றார்.
வேனில்

வேனிலில் இளவேனில், முதுவேனில் என இரு வகைகள் உண்டு. இளவேனில் காலத்தில் கோங்கும் இருப்பையும் மலரும். அரைத்த சந்தனம் தண்ணென்று இருக்கும். நன் மகளிரும் தண்மையை அடைவர். முதுவேலில் மலையைச் சார்ந்த இடங்களில் பாலையின் இயல்பு உண்டாகும்.
(தொடரும்)

குறுந்தொகை நூலாராய்ச்சி (பகுதி - 7): பொழுதுகள்

குறுந்தொகை நூலாராய்ச்சி (பகுதி - 7): பொழுதுகள்

பொழுதுகள்
    முதற் பொருளின் வகையாகிய பொழுது பெரும் பொழுது, சிறுபொழுதென இரு கூறுபடும். பெரும்பொழுதாவன கார், கூதிர், முன்பனி, பின்பனி, இளவேனில், முதுவேனில் என்பன. ஒவ்வொரு பருவத்திலும் இன்ன இன்ன மலர்கள் மலரும், இன்ன இன்ன விலங்குகள் இன்ன இன்ன நிலையை அடையும் என்பன போன்ற பல செய்திகள் உள்ளன. அவை புலவர்களுடைய நுண்ணறிவை வெளிப்படுத்தும்.
  பெரும்பொழுது
கார்
ஆவணி, புரட்டாசி மாதங்கள் கார் காலமாகும். இது முல்லைக்குரியது. கார்காலத்து மாலையில் மேகங்கள் அடர்ந்து மின்னி முழங்கி மழை பெய்கின்றன; அம் மழையினால் முல்லை நிலம் வளம் பெறுகின்றது; முல்லை மலர்ந்து மணக்கின்றது; பீர்க்கம்பூ விரிந்து பொன்னையும் பசலையையும் நினைப்பூட்டுகின்றது. கொன்றையும் குருந்தும் முகை யவிழ்கின்றன; ஆண்மான் பிணையோடு தனக்கினிய பசிய அறுகம்புல்லை வயிறார உண்டு பரல் நிறைந்த பள்ளத்தில் உள்ள தெளிந்த நீரை அருந்தித் துள்ளுகின்றது.

            மழையைக் கண்டு புலவர்கள் அடையும் ஆனந்தமும், அதனைப் புகழும் அழகும், தலைவிக்கு அதன்பால் உண்டாகும் பகைமையைப் புனைந்து காட்டும் இயல்பும் படித்துணர்ந்து இன்புறற்குரியன.
(தொடரும்)

குறுந்தொகை நூலாராய்ச்சி (பகுதி - 6) : நெய்தல்

குறுந்தொகை நூலாராய்ச்சி (பகுதி - 6) : நெய்தல் 
நெய்தல்
    கடலும் கடலைச் சார்ந்த இடமும் நெய்தல் நிலமாகும். கடற்கரையில் உள்ள மணல் மேட்டில் குடில் கட்டி வாழ்வார் பரதவர் எனப்படுவர். அவர் ஊர் சிறுநல்லூர் என்றும் சிறுகுடி என்றும் வழங்கப்படுகின்றது. கடற்கரையையும், கடற்கரைச் சோலையையும் கானல் என்பர். உப்பளங்கள் கடற்கரையில் இருக்கும்; அவை, ‘உப்பு விளை கழனி’ எனப்படும்.
    பரதவர் படகில் சென்று மீன் வேட்டை ஆடுவர். அப்படகிற்குத் திமில் என்று பெயர். அவர் திமிங்கிலத்தை எறியுளியால் எறிந்து கொல்வர். சில சமயங்களில் சுறாமீன் பரதவரைத் தன் கொம்பாலும் வாலாலும் எறிந்து புண்படுத்தி விடும். அக்காலத்தில் அவர்கள் புண் ஆறும் வரையில் தம் அகத்தில் தங்கியிருந்து ஆறிய பின்னர் மீண்டும் மீன் வேட்டையை மேற்கொள்வர். அங்ஙனம் புண்பட்ட ஒரு முதிய பரதவனை அவனது மனைவி உடனுறைந்து பாதுகாக்கும் செய்தி ஒன்று ஒரு பாட்டில் காணப்படுகின்றது. அவள் தன் வீட்டிற்கு வேண்டிய உணவுப் பொருளைப் பெறுவதையும் நினையாமல் உடனிருந்தே ஆவன செய்து அவனது புண் தணிந்து மீண்டும் மீன் வேட்டம் புக்க பின்னரே வேறு வேலையைக் கவனிக்கின்றாள்.
    பரதவர் தாம் கொணர்ந்த மீனைத் தம் வீட்டு முன்றிலில் மணலில் உலர்த்துவர். அதனால் அம் மணல் புலால் நாற்றம் வீசும். சிறு மீனை அவர்கள் வலையினால் பிடிப்பார்கள்.   நெய்தல் நிலமகளிர் உப்பை விற்று அதற்கு மாறாக வெண்ணெல்லைப் பெற்று உண்பர்.

    கடற்கரைச் சோலை பல மரங்கள் அடர்ந்து, உதிர்ந்த மலரும் மெத்தென்ற மணலும் பொருந்திப் பயில்வதற்கு இனிதாய் இருத்தலின் தலைவனும் தலைவியும் அளவளாவுதற்குரிய இடமாகப் பயன்படும். நெய்தல் நிலத்தலைவன் கொண்கன், சேர்ப்பன், துறைவன், புலம்பன் என்னும் பெயர்களால் வழங்கப்படுகின்றான்.
(தொடரும்)

சிறப்புடைய இடுகை

குறுந்தொகை நூலாராய்ச்சி (பகுதி - 29) - காந்தள்

குறுந்தொகை நூலாராய்ச்சி (பகுதி - 29) -  காந்தள் காந்தள்     குறிஞ்சி நிலத்துக்குரிய மலர்களுள் காந்தளும் ஒன்று. இது மிகுதியாக வளர்...